Mae gen i gefndir mewn celf. Fe astudiais gwrs Safon Uwch Celf, cwrs blwyddyn Sylfaen mewn Celf a Dylunio, Diploma Cenedlaethol Uwch mewn gemwaith a gof arian, a gradd mewn Dylunio Tri Dimensiwn mewn Metel yn Ysgol Gemwaith Birmingham. Fe ddechreuais fusnes dylunio a chreu gemwaith yn 1998 yng ngardd fy rhieni yn Llanelli dair blynedd wedi i fi raddio, cyn symud i weithdy a siop yn Abertawe. Bellach y mae gen i weithdy a galeri yng nghanol Llandeilo.

Rwy'n cael fy ysbrydoli a fy nylanwadu gan lawer o bethau. Rwy’n hoff iawn o deithio, yn enwedig i’r Eidal a Japan – dau le gwahanol iawn ond i mi maen nhw’n gyffrous yn weledol ac yn ddiwylliannol. Rwy’n cael fy ysbrydoli gan waith dylunwyr eraill sy’n gwthio’r ffiniau. Mae’r rhain yn cynnwys dillad y dylunydd Vivienne Westwood a phensaernïaeth Zaha Hadid. Cafodd fy nawn creadigol ei ddylanwadu yn gynnar iawn gan athro celf o’r ysgol gyfun. Ei enw oedd Norman Davies; yn anffodus bu farw ond roedd mor frwd a chefnogol i’w fyfyrwyr fel bod y rhan fwyaf ohonom yn dal i weithio fel artistiaid heddiw. Fe ddysgodd e ni i gwestiynu, gofyn pam ein bod yn gwneud y marc neu'r siâp penodol hwnnw, beth oedd ein meddyliau y tu ôl iddo - dyma sylfaen fy mhroses ddylunio hyd heddiw.

Rwy'n cael fy ysbrydoli gan bethau sydd o ddiddordeb i mi. Rydw i wrth fy modd yn eu braslunio, gwneud nodiadau a thynnu lluniau ac mae syniadau ar gyfer fy ngwaith yn datblygu o'r rhain. Mae'n dibynnu ar y darn o waith neu'r deunydd pwnc. Weithiau rwy'n dechrau gyda braslun neu nodiadau o syniad annelwig ac yn dechrau arbrofi a chwarae gyda defnyddiau. Mae hyn yn galluogi'r defnyddiau bron i benderfynu sut bydd y darn yn debygol o edrych yn y diwedd - er enghraifft, os yw darn o arian yn ymestyn a hollti wrth i mi ei haenu a'i wthio i eithafion, byddaf yn ei dderbyn ac yn aml yn ei amlygu i ddod yn rhan gynhenid o'r dyluniad. Nid yw'n bosib gorfodi hyn ac mae'n wych pan fydd hynny'n digwydd. Weithiau, fodd bynnag, os bydd y dyluniad yn gofyn, byddaf yn cynllunio'n ofalus ac yn datrys problemau'r darn a'i adeiladwaith cyn i mi ddechrau gweithio arno'n gorfforol. Yna rydw i'n dilyn y dyluniad fel rydw i wedi’i gynllunio o flaen llaw. Dw i wastad wrth fy modd gyda’r broses olaf o orffen a rhoi sglein i’r darn, gan ei bod yn rhoi ymdeimlad o gyflawniad i fi, ond wedyn does dim y fath beth â pherffeithrwydd felly mae’n rhaid gwybod pryd i stopio cyn i chi or-sgleinio a difetha’r cyfan.

Rwyf wrth fy modd yn gweithio gyda metelau gwerthfawr, aur, arian a phlatinwm. Mae pob un metal yn ymateb ychydig yn wahanol wrth eu torri, eu symud a'u siapio neu eu huno, felly fy hoff ffordd o weithio yw pan fydd y defnydd yn dylanwadu ar edrychiad terfynol y darn. Mae lliwiau aur yn fy swyno'n fawr, mae aur yn felyn wrth gwrs ond mae wedi'i gymysgu â metelau eraill i'w wneud yn fwy gwydn i'w wisgo, a dyna pam mae gennym safonau'r DU o 9ct 19ct 22ct ac ati. Rydym wedi arfer ei weld wedi'i gymysgu i'w gadw mor felyn â phosib ond newidiwch y rysáit ac mae gennych chi amrywiaeth o liwiau - ychwanegwch fwy o gopr ac mae'r ymddangosiad yn aur rhosgoch neu goch, ond mae ychwanegu arian a phaladiwm yn ei wneud yn wyn. Ar hyn o bryd rwy'n chwarae o gwmpas gyda chymysgu alwminiwm er mwyn rhoi gwawr borffor i’r aur.

Yn ogystal â'r metelau rwy’n eu defnyddio, rwyf wrth fy modd hefyd yn chwarae gyda cherrig gwerthfawr a lled werthfawr o bob lliw a'u cymysgu gyda metelau sy’n cyd-fynd â nhw. Ond os ydw i eisiau i fy nyluniadau ddisgleirio yna mae'n rhaid defnyddio diemwntau!

Mae’r newid neu ddatblygiad yn fy ngwaith i’w weld a’i olrhain trwy fy nghasgliadau a chomisiynau – mae’n anochel gan fy mod yn esblygu, yn tyfu ac yn dysgu’n gyson. Rwy'n dal i gynhyrchu rhai o'r casgliadau y dechreuais eu gwneud yn syth o'r brifysgol gan eu bod wedi aros yn amserol o ran dyluniad ac yr un mor boblogaidd gyda fy nghwsmeriaid ag yr oeddent ar y cychwyn. Efallai fy mod wedi eu haddasu ychydig ond ar y cyfan maent yr un peth a gallaf eu cysylltu yn ôl i'r union frasluniau a wnes i yn y brifysgol.

Fy man cychwyn bob tro yw meddwl am rywbeth y mae gennyf ddiddordeb ynddo, pwnc yr wyf am ei archwilio, ei astudio, ei gwestiynu i'w ailddiffinio a'i ailddychmygu.

I mi roedd yn ymwneud â hunaniaeth, fy hunaniaeth Gymreig fy hun fel rhywun di-Gymraeg o Lanelli. Beth oedd Cymru yn ei olygu i mi a sut roeddwn i'n perthyn i'm hamgylchedd a'm diwylliant a sut roedd hyn yn cyd-fynd â'r delweddau poblogaidd o Gymru sy'n cael eu cyflwyno'n fyd-eang? Roeddwn i eisiau newid y naratif a gwneud gwaith y gallwn uniaethu ag ef, felly dyluniais ddarnau a oedd yn arw fel rhannau o’r tirwedd, haenau a manylion a oedd fel y creigiau a’r llechi. Mae haenu'r metel yn cynrychioli strwythur llechi a ddarganfuwyd yng Nghymru ond i mi roedd yn cyfeirio at gwestiynu'n gyson beth oedd o dan yr wyneb.

Mae geiriau yn y Gymraeg (ac weithiau’r Saesneg) wastad wedi eu hysgrifennu mewn cerfwedd ac yn fy llawysgrifen fy hun. Mae hyn yn rhywbeth sy'n ei wneud yn bersonol ond hefyd yn bwerus. Mae eu hystyr neu'r teimlad tu ôl iddynt weithiau'n cael eu colli dros amser neu drwy eu cyfieithu, felly roeddwn i eisiau ychwanegu'r cysylltiad yma fel ei bod yn bosib eu cyffwrdd a'u teimlo gan ganiatáu i'r gwisgwr ychwanegu ei stori ei hun at y darnau.