Cefais fy magu ar Ynys Môn a mynychais Ysgol Uwchradd Bodedern cyn gwneud cwrs Sylfaen Celf a Dylunio am flwyddyn yng Ngholeg Menai, Bangor. Roeddwn yn hoff iawn o’r pwnc celf ers dechrau’r ysgol uwchradd, ond hefyd yn hoffi gwyddoniaeth. Astudiais Gelf, Bioleg a Mathemateg i Safon Uwch a phenderfynu fy mod am astudio Pensaernïaeth yn y Brifysgol. Cyn mynd i Brifysgol Caergrawnt i wneud hynny, rhoddodd y cwrs Sylfaen gyfle i mi arbrofi gyda gwahanol arddulliau a defnyddiau, yn ogystal â magu hyder wrth drafod cysyniadau a hanes celf. Roeddwn yn cydweithio gyda’r artist Almaenig Benjamin Walther dan yr enw ‘Awst & Walther’ am ddeng mlynedd rhwng 2007 – 2017 ac yn rhannu ein hamser rhwng Caernarfon a Berlin.

Land Art – artistiaid oedd yn archwilio’r berthynas rhwng tirwedd neu safle benodol a chelf yn yr 1960au e.e., Richard Long, Robert Smithson, Nancy Holt a Joseph Beuys. Roedd yr artistiaid hyn yn chwareus iawn efo defnyddiau a ffurfiau ac yn gwthio ffiniau celf wrth ei thynnu allan o orielau ac amgueddfeydd, a hefyd wrth greu gwaith ar raddfa fawr neu bensaernïol hyd yn oed. Roeddent yn defnyddio’r tir neu bridd neu gerrig fel defnyddiau crai yn eu celf, ac yn ceisio newid persbectif pobl am y byd o’u cwmpas. Yn fwy diweddar, mae artistiaid fel Olafur Eliasson, Pierre Huyghe, Roni Horn (a finnau drwy waith Awst & Walther) yn datblygu’r un themâu ond mewn cyd-destun cyfoes. Mae hyn yn eithriadol o bwysig, yn fy marn i, o ystyried yr argyfwng ecolegol, cynhesu byd-eang a phroblemau cymdeithasol cysylltiedig.

Datblygu syniadau sy’n dod gyntaf: meddwl am bynciau sy’n fy niddori, a beth ydw i eisiau ei ddweud efo’r darn. Pwy yw’r gynulleidfa, a pha fath o effaith bydd y darn yn ei chael ar bobl sy’n ei weld? Lle mae am gael ei arddangos – mewn oriel neu'r tu allan? Sut fath o gyllid sydd ar gael ar gyfer creu’r darn? Mae hyn oll yn effeithio ar ddefnyddiau a ffurf y darn celf e.e. cerflun / gosodiad / ffilm / perfformiad.

Rydw i’n gweithio lot fawr mewn llyfrau braslunio – yn gwneud nodiadau a brasluniau o wahanol ddarnau ac amrywiol fersiynau ohonynt. Rydw i hefyd casglu delweddau a’u gludo i fewn. Dyma sut rwy’n casglu syniadau.

Yn olaf, y creu ei hun – ydw i’n gallu creu’r darn fy hun yn y stiwdio, neu oes angen help technegydd? Mae’n dibynnu ar y defnyddiau a maint y darn yn aml e.e., os ydw i’n creu ffilm, mi alla i wneud llawer o’r gwaith fy hun ond efallai mod i eisiau i gerddor gyfansoddi darn sain. Ond os yw’r darn yn fawr a chymhleth allan o fetel neu bren, bydd angen i mi gydweithio efo gof neu saer.

Mae hyn yn amrywio yn fawr a dydw i ddim yn cyfyngu fy hyn i un palet o ddefnyddiau, ond yn defnyddio ystod eang yn dibynnu ar y prosiect. Dros y blynyddoedd, rwyf wedi defnyddio pren, metel, gwydr, cerrig, concrid, rhew, gelatin, grawnwin, cregyn, gwrychoedd a phridd. Mae’n bwysig bod yn agored efo defnyddiau, er mwyn medru dewis beth sy’n fwyaf perthnasol ar y pryd, yn fy marn i. A chwilio am ddefnyddiau newydd, diddorol yn gyson.

Drwy’r profiad o arddangos fy ngwaith mewn dinasoedd gwahanol dros y blynyddoedd (yn cynnwys Caerdydd, Llundain, Berlin, Prag, Basel a Moscow), rwyf wedi dod yn llawer mwy hyderus ac yn fwy parod i fynegi fy hunaniaeth yn y gwaith. Cymraes ydw i, efo fy ffordd unigryw o edrych ar y byd o ‘nghwmpas. Mae’n brofiad anhygoel cerdded i lawr stryd yng nghanol Berlin a gweld gosodiad enfawr o gregyn gleision a gasglais ar lannau’r Fenai. Mae’n bwysig cadw gafael ar yr hyn sy’n eich diddori a’ch cyffroi chi, a dathlu’r hyn sy’n eich gwneud chi’n unigryw, oherwydd mae gan bob artist ei stori bersonol ei hun i’w rannu efo’r byd.