Dechreuais i arddangos gweithiau celf ar ddiwedd yr 1980au, ac ers hynny rwyf wedi gwerthu gwaith a theithio ar draws y byd. Cefais i fy magu ar fferm fynydd yng Nghefnddwysarn ger Y Bala, ond rwyf wedi byw wrth ymyl y môr ym Mhwllheli ers 1996. Cymreictod - neu yn hytrach y profiad o fyw yn Nghymru - yw un o'r themâu cryfaf yn fy ngwaith; mae'r ddresel, y dillad, wynebau ac arferion y teulu i gyd yn aml wedi’u gweu drwy'i gilydd ac yn mynnu sylw. Dros amser, datblygodd y themâu cartrefol a theuluol i gynnwys elfennau o'r symbolau twristaidd o Gymru, fel y llieiniau sychu llestri ystrydebol. Mae atsain o fy nhirluniau cynnar o fynyddoedd y Berwyn yn amlwg yn fy narnau diweddaraf, ond arfordir a thraethau Penrhyn Llŷn yw'r ysbrydoliaeth erbyn hyn.

Mae delweddau o fy nghefndir a fy magwraeth ym Meirionnydd yn amlwg yn fy ngwaith - y cartref a’r fferm; y dathlu a’r dillad; y gerddoriaeth a’r diwylliant Cymraeg; yr arferion teuluol a’r wynebau cyfarwydd.

Ers symud at y môr i Bwllheli, mae fy ngwaith yn dangos delweddau’r llieiniau sychu llestri twristaidd o Gymru, yn ogystal â'r diwydiannau morwrol lleol. Mae’r cychod a’u hwyliau, y porthladdoedd a’r tirlun sy’n ddieithr i’r ferch o fferm fynydd Llwyniolyn, yn elfennau pwysig yn fy ngwaith diweddar.

Rwyf wedi arddangos fy ngwaith (yn helaeth) ar hyd a lled Cymru, mewn orielau yn yr Alban, Lloegr ac Iwerddon. Mae fy nghyfres Ffrogiau Cerdd Dant wedi eu gweld mewn arddangosfa lwyddiannus iawn, Prints of Wales, a gafodd ei chynnal yn y Belger Arts Center, Kansas City, U.D.A. Yn ystod y blynyddoedd diwethaf mae galw mawr wedi bod am fy ngwaith gan gasglwyr preifat ac mae’r ymateb i’r darnau newydd wedi bod yn galonogol iawn. Mae fy ngwaith yn barod mewn casgliadau preifat ym mhob rhan o Ynysoedd Prydain, Ffrainc, Yr Almaen, Hwngari, Japan, Canada, America a China, yn ogystal ag yng nghasgliadau cyhoeddus Llyfrgell Genedlaethol Cymru, Amgueddfa Gymreig o Gelfyddyd Fodern Y Tabernacl, Cyngor Sir Gwynedd, Oriel Ceredigion Aberystwyth ac Oriel Casnewydd Gwent.

Rwyf wedi ymddangos ddwywaith ar y rhaglen deledu Byd o Liw. Y tro cyntaf i fi ymddangos ar y rhaglen, roeddwn i'n ymateb yn gelfyddydol i bosteri Harry Riley o Aberystwyth. Yn 2002, cynhyrchodd Ffilmiau’r Bont raglen Catrin Williams - Portread, ac fe roddodd y rhaglen gyfle i fi edrych yn ôl o’r newydd ar fy nghynefin a fy nylanwadau cynnar. Yn 2020, fi oedd un o’r artistiaid fuodd yn creu portread ar raglen, Cymry ar Gynfas ar S4C. Dros y tri deg mlynedd diwethaf, mae nifer o eitemau am fy ngwaith wedi eu darlledu ar sawl sianel deledu - S4C, BBC1 Cymru, ITV Cymru, BBC2 drwy Brydain a sianel TG4 yn yr Iwerddon.

Ers i mi raddio o’r Coleg Celf yn Nghaerdydd dros dri deg mlynedd yn ôl rwyf yn dal i roi fy egni i baentio a darlunio fy myd. Rwy’n datblygu cyfresi o waith unigryw, yn eu harddangos yn gyson ac yn credu’n gryf mewn annog a chefnogi artistiaid eraill o ddosbarthiadau meithrin ymlaen ac o bob cornel o’r gymdeithas. Yn aml iawn rwyf yn dod ar draws myfyrwyr colegau celf sy’n astudio fy ngwaith - myfyrwyr sy’n awyddus i drafod eu crefft ac yn awyddus i ennyn fy mrwdfrydedd.

Rwyf fel arfer yn gweithio ar gyfer arddangosfa benodol. Ym mis Ionawr 2021, gwnes i arddangosfa unigol yn Oriel Plas Glyn y Weddw, a’r themâu oedd cerddoriaeth Gwenno Saunders a Lleuwen Steffan.

Rwyf yn dechrau drwy ddarlunio lluniau yn fy llyfr braslunio sy'n cyd-fynd â'r thema, a hefyd yn gwrando ar y gerddoriaeth, sydd yn ysbrydoli delweddau.

Wedyn rwyf yn ail-greu’r ddelwedd wrth weithio mewn dull monoprint ar ddefnydd, wedyn yn ychwanegu lliw gydag inc a phaent ac yna’n gwnïo darnau bach o ddeunyddiau lliwgar fel clytwaith, gan o bosib ychwanegu pasteli, cyn fframio’r gwaith mewn ffrâm wen â gwydr.

Rwyf hefyd wedi creu clogynnau i’r ddwy gantores eu gwisgo wrth berfformio yn yr arddangosfa - un goch i Gwenno gyda delweddau o ddreigiau a ffigyrau chwedlonol ac un las i Lleuwen sy’n darlunio ffigyrau Bendigeidfran.

Rwyf yn hoffi defnyddio defnyddiau cymysg - o bapur, i ddefnydd leinin cyrtens a chynfasau, pren a byrddau. Rwyf yn creu delweddau wrth brintio, yn defnyddio inciau lliwgar, gwnïo defnyddiau ac yn defnyddio paent olew a phasteli.

Mae’r gwaith yn datblygu drwy’r amser. Mae llawer o’r gwaith personol yn deillio o brofiadau personol, digwyddiadau teuluol neu olygfa hardd.

Mae gweithio ar gomisiynau yn newid y gwaith hefyd. Yn 2021 cefais gyfle i greu portread o Beti George ar raglen S4C, Cymry ar Gynfas. Yn dilyn y profiad hwn, rwyf yn bwriadu cyflwyno mwy o bortreadau i fy ngwaith personol.