Cefais fy ngeni yn Sarnau, ger y Bala yng ngogledd Cymru, ond rwyf wedi byw am flynyddoedd yng Nghaerdydd, gyda chyfnodau yn Zimbabwe fel artist preswyl yn yr Oriel Genedlaethol yn 1991 a 1994. Bellach, rydw i wedi ymgartrefu yng Nghefneithin, Cwm Gwendraeth. Rwy’n adnabyddus fel artist, awdur a darlithydd. Dechreuais ar drywydd gwahanol iawn yn y coleg yn Aberystwyth gan gofrestru i wneud gradd daearyddiaeth ond buan iawn fe wnes i ddychwelyd at fy nghariad cyntaf sef celf, a chwblhau gradd MA mewn Celfyddyd Gain yng Ngholeg Celf Caerdydd yn 1993. Ers 1990 rwyf wedi cael arddangosfeydd unigol, ac wedi cymryd rhan mewn nifer o arddangosfeydd grŵp yng Nghymru a thramor, ac mae fy ngwaith i’w weld mewn sawl casgliad cyhoeddus a phreifat. Fe arddangoswyd fy ngwaith mewn pedair dinas yn Tsieina yn 2009. Rwyf wedi cyhoeddi llyfrau a thraethodau ar y pwnc celf gyfoes yng Nghymru, wedi darlithio yn aml ar y pwnc, yn ogystal â chyflwyno rhaglenni celf i S4C a chael cyfweliadau ar y cyfryngau. Trafodir fy ngwaith mewn nifer fawr o gyhoeddiadau ar gelfyddyd gyfoes yng Nghymru.

Rwy’n diddori yn bennaf mewn hunaniaeth ddiwylliannol - y diffiniad o 'berthyn' i le arbennig - tra hefyd yn parhau i fod yn ddinesydd o'r byd mawr. Mae fy hunaniaeth bersonol, fy ngwreiddiau a'm cefndir yn arwyddocaol yn fy ngwaith. Rwy'n gweld y gwaith fel llun neu fap o fy nheimladau a'm hunaniaeth a diwylliant. Rydw i wedi cael fy nylanwadu gan nifer o artistiaid dros y blynyddoedd; Augustus John, David Jones, Chagall, Tapies, ond yn bennaf mae atynfa gref tuag at waith artistiaid llai adnabyddus o America Ladin ac Affrica.

Byddwn i'n disgrifio fy ngwaith fel darluniau yn hytrach na chasgliad o baentiadau, hyd yn oed pan fydda i'n defnyddio paent i wneud marciau. Mae fy ngwaith yn defnyddio symbolau i ddangos elfennau gwrthgyferbyniol mewn bywyd. Yn y bôn, mae fy ngwaith yn ymwneud â deuoliaeth. Fel arfer rwy'n gadael i’r marciau ar y papur fy arwain, ac mae'r thema'n datblygu wrth i'r llun ei hun ddatblygu. Mae gwaith y llaw a’r llygaid, drwy hap a damwain, yn gweithio ar y cyd gyda’r syniadau sydd yn fy mhen. Dydw i byth yn paratoi brasluniau o flaen llaw. Mae popeth sydd yn y darlun yn digwydd ar y pryd, yn y funud. I mi, mae hyn yn cadw’r llun yn fyw.

Yn y gorffennol roeddwn yn defnyddio olew ar gynfas, ond ers rhyw ddegawd rydw i wedi canolbwyntio ar gyfryngau cymysg ar bapur Khadi ‘cotton duck’ o’r India. Papur trwchus yw hwn sydd wedi ei wneud â llaw. Yn wahanol i bapur arferol nid o goed y mae'n cael ei greu ond o sbarion diwydiant cotwm yn yr India. Byddaf yn defnyddio golosg, pastel, inc a phethau llai proffesiynol fel bagiau te Roobios a tippex weithiau! Rwy’n hoffi cyfleu’r syniad fod y gwaith yn hynafol, fel dogfennau o’r gorffennol.

Mae hi'n cymryd amser i artist i ddod o hyd i ‘iaith’ bersonol. Tra oeddwn i yn y Coleg Celf, gwnes i ddechrau drwy ganolbwyntio ar gerflunio dan ddylanwad gwaith y Minimalwyr (Minimalists), ond roedd yn anodd gweithio mewn ystafell wely mewn tŷ roeddwn yn ei rannu gydag eraill, felly dechreuais ddarlunio. Chwedloniaeth Cymru oedd fy mhrif bwnc ar y pryd. Wrth i fy ymwybyddiaeth o wleidyddiaeth ehangu, dechreuodd y gwaith hefyd fynd yn fwy gwleidyddol. Llwyddais i gael stiwdio mewn hen adeilad gwag yng Nghaerdydd a datblygodd fy ngwaith. Enillais Fedal Aur yr Eisteddfod yn 1997 gyda darnau mawr o ran maint. Wrth gwrs, roedd yn amhosib gwneud bywoliaeth gyda lluniau mawr fel hyn, felly erbyn hyn rwy'n creu darnau llawer llai.