Rydw i'n dod o Sir Benfro yn wreiddiol ac es i i ysgolion celf yn Llundain, Norwich a Chaergaint. Roedd fy mam yn gweithio fel cogydd mewn cartref nyrsio ac roedd fy nhad yn fecanig ceir.

Pan oeddwn i yn yr ysgol, roeddwn i'n mwynhau beicio o fy nghartref yn Johnston i Oriel Graham Sutherland yn Picton. Roedd tirweddau Sutherland yn ysbrydoliaeth gynnar. Mae ychydig o’r gwaith o’r oriel hon bellach wedi’i drosglwyddo i Oriel y Parc yn Nhyddewi.

Yn Ysgol Gelf Norwich, Ana Maria Pacheco oedd yn gyfrifol am Gelf Gain. Arlunydd ysbrydoledig, gwneuthurydd printiau a cherflunydd oedd Ana Maria Pacheco, a dysgodd hi ymdeimlad o ddisgyblaeth i’w holl fyfyrwyr a chael y gorau ohonyn nhw, drwy eu hannog i weithio'n galed a dilyn eu gweledigaeth eu hunain.

Roedd fy ngradd Meistr yng Nghaergaint mewn Celf a Phensaernïaeth. Helpodd hyn fi i ganolbwyntio ar y syniad o ymarfer celf ymatebol i safle a chelf safle-benodol.

Ymhlith y dylanwadau mawr eraill mae artistiaid Dadeni’r Eidal, yn enwedig Giotto, Piero della Francesca, Bellini, Caravaggio a Tintoretto; artistiaid o'r 19eg ganrif fel Cezanne a Van Gogh; artistiaid yr 20fed ganrif gan gynnwys Picasso, Rothko, Rauschenberg, Abromovic a Mendieta; ac artistiaid mwy diweddar fel Salcedo, Whiteread, Gates a Bruguera.

Mae cerddoriaeth yn ysbrydoliaeth enfawr i fi. Max Richter, Steve Reich, Philip Glass, Benjamin Britten a Thomas Tallis yw rhai o fy hoff gyfansoddwyr. Rydw i hefyd wrth fy modd gyda gwaith David Bowie, PJ Harvey, The Dead Weather, Radiohead a Nick Cave.

Rydw i bob amser yn dechrau drwy ymateb i rywbeth, boed hynny’n wleidyddol, yn ddiwylliannol, yn ymwneud ag amser neu sefyllfa. I ddechrau, rydw i'n gwneud nodiadau ysgrifenedig ac yna'n meddwl sut galla' i droi fy syniadau yn ffurf neu'n berfformiad. Mae'n golygu llawer o arbrofi a chamgymeriadau, gyda llawer o fethiannau ar hyd y ffordd, cyn cyrraedd fersiwn derfynol rydw i'n weddol hapus â hi. Dydy hyn ddim yn golygu bod y gwaith yn ddatganiad diffiniedig bob tro, ond mae’n bwynt lle dw i eisiau creu cofnod. Yn aml, rydw i'n gwneud sawl fersiwn neu gyfres o ddarnau cysylltiedig.

Os ydw i'n defnyddio deunyddiau, rydw i'n ceisio dewis beth bynnag sydd yn fwyaf priodol ar gyfer y syniad a chyrraedd canlyniad mor syml a chlir â phosibl. Rhan o'r broses hon yw arbrofi a chwarae gyda gwahanol ddefnyddiau. Os yw'n waith perfformiadol, unwaith eto mae treialu ac adolygu cyson yn allweddol. Fel rheol, mae darnau perfformiadol yn cael eu cofnodi trwy luniau neu fideo.

Does dim ffefryn gen i - cyhyd â'i fod yn cynnig rhywbeth i'r cysyniad, rwy'n fodlon defnyddio unrhyw beth mewn gwirionedd.

Pan oeddwn i’n fyfyriwr, roeddwn i’n paentio a gwneud printiau gan fwyaf, ond ym mlwyddyn olaf fy ngradd ac yn fy MA dechreuais i ymgorffori deunyddiau sydd ar gael ar hap, fel tecstilau, deunyddiau adeiladu a phren sydd wedi'i adfer.

Ar ôl i fi orffen astudio, parheais i gyda'r dull cyfryngau cymysg yma ac yn y diwedd datblygais i waith gan ddefnyddio ffotograffiaeth a fideo. Roedd ymwybyddiaeth gynyddol ddwys o safle a thestun yn ysgogiad i lawer o fy ngwaith.