Dw i’n artist Cerameg sy wedi astudio cwrs Sylfaen yn y Coleg Celf yng Nghaerfyrddin, BA mewn Cerameg yn Ysgol Gelf Caerdydd ac MA mewn Dylunio Cerameg ym Mhrifysgol Swydd Stafford.

Fe ges i fy ngeni yn 1978 a fy magu yn Aberystwyth. Dw i bellach yn gweithio ar fy liwt fy hun yn Stiwdio FWCS (Stiwdio Glai Fireworks) yng Nglanyrafon, Caerdydd.

Fe ges i feiros darlunio a set dda o baent dyfrliw pan oeddwn i tua 11 mlwydd oed gan fy rhieni. Dyna sut dw i’n parhau i ddarlunio hyd heddiw. Roedd fy rhieni i hefyd yn mynd â ni i orielau i weld celf felly roedd mynychu orielau yn brofiad eithaf cyfarwydd i mi.

Fe ges i athro da yn Ysgol Penweddig o’r enw Mr Glyn Thomas a oedd yn rhoi pwyslais ar ddarlunio. Mae hyn yn sicr wedi rhoi sylfaen dda i mi.

O ran artistiaid dw i’n eu hedmygu, dw i’n mwynhau gwaith yr artist Eric Ravilious (artist rhyfel oedd hefyd yn creu murluniau ac yn gwneud gwaith darlunio i Wedgwood) a Jaime Hayon (dylunydd o Sbaen).

Dw i’n artist Cerameg, ond mae’r arwyneb, sef y gwaith darlunio sy’n addurno’r gwaith yn chwarae rôl bwysig yn y darnau gorffenedig. Mae mwyafrif y gwaith darlunio yn cael ei greu gydag inc a phaent dyfrlliw, ond ar adegau bydda i'n trin a thrafod y darluniau yn ddigidol neu’n defnyddio cyfrwng cymysg.

Dw i’n tueddu i ddefnyddio clai gwyn wedi’i danio’n uchel i greu fy ngwaith - naill ai ‘bone china’ neu borslen. Dw i’n defnyddio technegau diwydiannol ar raddfa fach, sef castio â slip sy’n golygu bod rhaid cychwyn drwy greu mowldiau o blastr cyn castio gyda’r clai ei hun. Mae’r darnau yn cael eu tanio rhwng 4-5 o weithiau sy’n debyg i'r broses greu yn y maes diwydiannol. Dw i’n ychwanegu gwydredd o wahanol liwiau; y darluniau wedi eu trosglwyddo i bapur transffer ac yn gorffen y gwaith gyda lystar aur neu blatinwm. Roedd fy ngradd meistr i yn Swydd Stafford yn ddylanwadol iawn ar y ffordd dw i’n creu fy ngwaith. Roedd y penderfyniad i fynd yno yn un bwriadol gan fy mod i am geisio efelychu’r llestri oedd yn addurno cartref fy Nain.

Dw i hefyd wedi arbrofi dros y blynyddoedd gyda golau drwy greu canwyllbrennau a phaneli lithoffan (gweler y ffilm); papur wal; darlunio ar gyfer llyfrau, creu gosodwaith ar breswyliad ym Mecsico, addurno Bocs BT (gweler y llun) a chreu nifer o dlysau ar gyfer sefydliadau gwahanol.

Heb os, darlunio a phaentio gyda phaent dyfrlliw. Dw i hefyd yn mwynhau bod gweddill y gwaith yn eitha technegol, gan fod yna batrwm i’r math yna o weithio.

Dw i’n gweld fy ngwaith i mewn tri chyfnod gwahanol ac ar y funud dw i’n rhagweld fy mod i’n dechrau ar fy mhedwerydd cyfnod.

Y deunydd clai, y paled lliw a themâu’r darluniau sydd wedi newid yn ystod y datblygiadau hyn. Dechreuais drwy weithio gyda chlai porslen yn dogfennu cartref fy Nain gyda phaled mwy cochlyd a thywyll; yna symud ymlaen i ddefnyddio clai pridd gwyn gan ymateb yn fwy i gasgliadau mewn amgueddfeydd neu’r byd o’m hamgylch. Dechreuodd y trydydd cyfnod yn ystod fy nghwrs MA lle newidiodd y clai, themâu’r gwaith, yr addurn a’r paled lliw. Roedd y casgliadau yma’n llawer ysgafnach gan fy mod i’n defnyddio lliwiau ysgafnach fel pinc, melyn, oren a glas golau. Roeddwn i’n teithio yn ôl ac ymlaen o Aberystwyth i Stoke-on-Trent ar y pryd felly dw i’n meddwl mai’r newid yn y golau rhwng y ddau le effeithiodd ar hyn.

Dw i ar fin cychwyn prosiect arbrofol i greu gweithiau unigryw (one off) yn lle creu nifer cyfyngedig o’r un darnau. Yn dra gwahanol i’r gwaith arbrofol, bydda i hefyd yn mynd ati i greu casgliad ymarferol ‘bob dydd’ ar gyfer y cartref. Dw i’n rhagweld y bydd natur y lliwiau yn newid unwaith eto.