Cefais fy ngeni yn Aberystwyth yn 1964 a’m magu ym mhentref cyfagos Cefnllwyd. Astudiais yng Ngholegau Caerfyrddin a Chaerdydd lle graddiais mewn Celfyddyd Gain gan arbenigo mewn argraffu. Dw i wedi gweithio fel artist proffesiynol ers diwedd yr wythdegau. Yn 2015 fe wnes i gwblhau cwrs ôl-radd yn Ysgol Gelf, Prifysgol Cymru Aberystwyth. Er mai printio yw fy mhrif gyfrwng, rwyf wedi ehangu fy sgiliau i gynnwys dylunio, darlunio, murluniau ac addysgu rhan-amser.

Yn yr ysgol gynradd roedd gweithgareddau celfyddydol yn rhan bwysig o’r patrwm dyddiol. Fe fues i'n lwcus iawn hefyd o gael fy nysgu gan yr athro ysbrydoledig John Rowlands tra oeddwn i yn Ysgol Gyfun Penweddig, ac yna Osi Osmond tra oeddwn i ar gwrs sylfaen yng Nghaerfyrddin. Rwy’n cael fy ysbrydoli gan yr hyn rwy’n ei weld o’m cwmpas. Gan fy mod i’n byw mewn ardal wledig mae byd natur, yr iaith a thraddodiadau sy’n ymwneud â’m milltir sgwâr yn bwydo i mewn i fy ngwaith yn naturiol. Rwy’n hoff iawn o straeon, llên gwerin a dywediadau. Rwy’n cael ysbrydoliaeth o drawstoriad eang iawn o wahanol artistiaid a ffynonellau. Rwyf wrth fy modd yn ymweld ag orielau ac arddangosfeydd i weld gwaith cyfoes a hanesyddol, yn ogystal â chrwydro strydoedd dinesig yn edrych am furluniau a graffiti. Fel un sy’n argraffu dw i wrth fy modd gyda gwaith y Mynegiadwyr Almaenig fel Erich Heckel,Kirchner a Nolde a gwaith argraffu Paul Peter Piech a'r argraffwr /paentiwr William Brown.

Mae’r broses o greu darn yn y gyfres ‘Menywod Cymreig’ yn digwydd mewn tair rhan. Byddaf yn treulio diwrnod yn y stiwdio yn paratoi'r cefndir ar gyfer y gwaith, drwy wlychu darn o bapur argraffu ‘Hahnemühle’ ac incio darn o bersbecs gyda chyfuniad o liwiau i greu cefndir. Byddaf yn gosod y darn papur ar y persbecs a’i roi drwy’r wasg. Mae’r darnau hyn yn cael gorffwys am 48 awr rhwng haenau o bren haenog gyda phwysau trwm arnynt. Bydd hwn yn golygu bod y papur yn sychu yn gwbl wastad heb grebachu. Byddaf yn troi at y llyfr braslunio, a dewis syniadau i’w datblygu. Gan ddefnyddio'r dull monoprint, byddaf yn gosod y darn papur efo lliw cefndir wyneb i lawr ar haen o inc, yna'n llunio’r darlun ar gefn y papur. Rhaid gadael i’r darn sychu am 48 awr cyn mynd ati i’w baentio â llaw.

Rwy’n defnyddio pob math o dechnegau yn fy ngwaith e.e., wrth ddatblygu'r gyfres ‘Y Ladis’ dw i wedi defnyddio monoprint, torluniau leino, cludwaith a chlai.

Rwy’n dewis deunydd a thechneg yn ôl yr hyn dw i am ei fynegi. Rwyf wedi arbrofi drwy wneud gwaith fideo, animeiddio, toriadau papur, gosodiadau a chrochenwaith.

Rwy’n ffafrio leino dros bob deunydd ac yn dwli ar ba mor eang yw’r defnydd ar gyfer gwneud marciau. Rwy’n darlunio rhywfaint pob dydd, boed e’n ddwdl cyflym neu'n wneud cynllun mwy cymhleth. Mae fy llyfr braslunio yn dod gyda fi i bobman.

Er mwyn gwneud bywoliaeth fel artist llawrydd, dw i wedi gorfod datblygu fy sgiliau a dysgu technegau a dulliau newydd o weithio. Er bod y gyfres Y Ladis yn boblogaidd ac yn llwyddianus iawn dw i ddim am gyfyngu fy hunan i’r arddull yma. Rwy’n fodlon trio pethau newydd ac yn aml yn chwarae gyda deunyddiau heb unrhyw fwriad i greu darn o gelf, dim ond arbrofi efo’r deunydd a dysgu wrth fy nghamgymeriadau. Dw i dal i gredu mai darlunio, edrych ac astudio yw’r sylfaen orau beth bynnag yw’r cyfrwng dw i’n ei ddewis i greu darn gorffenedig.